1Th 2 | MMX | STEP | Luvutnetak mi luvurinuk. Nemi mikleklen i do lovotpot atnama ga visik asu levempipisik nunuan.

1 Thessalonians 2

Lugugu At Ne Pol To Tesalonia

1 Luvutnetak mi luvurinuk. Nemi mikleklen i do lovotpot atnama ga visik asu levempipisik nunuan. 2 Miklen i do maga vavang avot to Pilipai la limixin mego diga lox asongot nama, la diga paase sese kapmek tinama. Melemu magat pas uto at lemenemen atnimi dom Tesalonia, la buaang atnedi diga xopara nama; ketla ne Moroa ga lok kepe lanmarat basinge nama; la maga tong asu Lagale Lavavang tinimi. 3 Se maga vavang tinimi, maga paase mokmokso, la luruptuvuk atnama ga lox avukat aleng la ma goxo xarang nimi. 4 Ganoxa ne Moroa ga ven i do lorooro atnama ga lox avukat la ga raba nama mi Lagale Lavavang teren kusu mana tong asu i. Maga xopara na emi asu minama; ketla maga vavang kusu ne Moroa na lok momo minama, neni iklen lodoxoma atnama do i lox avukat kopla kopmen. 5 Ap mo laaleng maga vavang tinimi, ma goxo lox atdan kaka tevempanga atnimi la ma goxo ruuna loklok belegaao. Nemi miklen i na la ne Moroa bok iklen i do loklok atnama ga lox avukat mun. 6 La maga xopara limixin petpes eburu minemi mina emi asu minema.

7 Ketla nema luvuttadi vavang at ne Iesu Karisito; la keneng at na maga epovo ri sing panga nimi, ketla ma goxo lox i xuren. La ma goxo paase lolos tinimi, ketla loklok atnama gak lok mulus atnaasan mun kerekngan latkin i lok tatao laxamdak mi laxaalik kakalik teren. 8 La maga lolos aleng kusu mana tong asu Lagale Lavavang tinimi la magap kip levenmumuat. Kerepmo maga balamu nimi.

9 Luvutnetak mi luvurinuk. Mina doma bilong ti mo lugugu lolos atnama. Maga tong asu Lagale Lavavang at ne Moroa rinimi, la maga gugu at lengkangking la at lengkanimin, maga gugu pilas kusu nemi mi noxo kepe tevempilas atnimi xusu ri lok tooro nama. 10 Miga reven loklok atnama, la ne Moroa bok ga reven i, dola luruptuvuk atnama gak mokso la ga lox avukat aleng kantubu atnemi limixin nuunu la goxopmen taxakapmek gak lok atnama. 11 Miklen i do maga anasa nimi getgesara ngan laradi i anasa lamdak teren. 12 Maga paase tooro nimi, la maga paase amenemen nimi, la maga paase aronga nimi xusu lorooro atnimi na lox avukat kerekngan ne Moroa i vara i. Moroa ga ro ka nimi xusu minaba nemen eburu min to xeneng at Linintoo ren la minaba lok kaka lisisixam teren.

13 La nema ma tong avukat amisik ti ne Moroa mumu nimi. Ap mo laaleng miga siam kaka levelinga at ne Moroa maga tong asu i rinimi, miga doma i do mo levelinga boro at ne Moroa, la goxopmen levelinga at luvuttadi gamasa. Mo levelinga i gugu xeneng at lorooro atnemi limixin mi nuunu.

14 Luvutnetak mi luvurinuk. Lorooro atnemi ga vee ngan lorooro at limixin nuunu at ne Moroa to Judaia, mo di nuunu at ne Iesu Karisito; nedi digap kip levesongsongot mumu lunuunu atdi, mila limixin me Judaia axa diga lox asongot di; la kerepmo nemi bok migap kip levesongsongot, mila limixin mi legesa vapaase atnimi axa diga lox asongot nimi. 15 La mo limixin me Judaia diga sev amet Leeme Silok ne Iesu; ganoxa lavalabat atdi diga sev amet lavaeme vapaase alii at ne Moroa. La nedi diga riki xepe nama boro at lenep silok Judaia. Moroa i xopara ri mo loklok atdi. La di lok kapmek lixitkis at limixin axap keretna; 16 digak lok pe nama xusu ma noxo tong asu bok Lagale Lavavang tinedi limixin kopmen di me Judaia, kusu di noxo vubeles at Linintoo at ne Moroa. Laxakapmek atnedi limixin me Judaia i silok la mo laxakapmek ti lok pe limixin kopmen di me Judaia i lox asilok laxakapmek atdi. Kuren la lebelemamao at ne Moroa ira rupot pam saparap di.

Pol Ga Vara Aleng I Xusu Na Ven Limixin Boro Tesalonia

17 Luvutnetak mi luvurinuk. Leventaba limixin dom Tesalonia diga riki xepe nama basinge nimi, la maga nemen to Atens at leventaba leven gaaling. Ketla maga doxoma amisik nimi, la maga lok bukbulu aleng la maga lolos kusu mana vot pasa nimi. 18 Maga lok do mana vot pasa nimi; nenia xa, ne Pol, amisik aga lok tong pen i xusu ana vosiga nimi, ketla ne Satan ga tu pe nama. 19 Maga lolos do mana vosiga nimi mila lunuunu atnimi i lox alolos lorooro atnama; la mi lox amomo nama; la maba lok momo aleng ap mo laaleng Leeme Silok, ne Iesu nabamlong teren, mila mi tu lolos at lunuunu atnimi. 20 I ruturun tinotno. Mi lox amomo aleng nama.